ਵਿਗਿਆਨਕ ਜਾਗਰੂਕਤਾ ਵਕਤ ਦੀ ਮੁਖ ਲੋੜ
ਸੰਗਰੂਰ, 9 ਜਨਵਰੀ (ਮਾਸਟਰ ਪਰਮ ਵੇਦ): ਤਰਕਸ਼ੀਲ ਸੁਸਾਇਟੀ ਪੰਜਾਬ ਜ਼ੋਨ ਸੰਗਰੂਰ-ਬਰਨਾਲਾ ਦੀ ਮੀਟਿੰਗ ਸੂਬਾ ਜਥੇਬੰਦਕ ਮੁਖੀ ਹੇਮ ਰਾਜ ਸਟੈਨੋ ਤੇ ਜ਼ੋਨ ਮੁਖੀ ਮਾਸਟਰ ਪਰਮ ਵੇਦ ਦੀ ਅਗਵਾਈ ਵਿੱਚ ਹੋਈ. ਜਿਸਦਾ ਚੇਤਨਾ ਪਰਖ ਪ੍ਰੀਖਿਆ ਦੀ ਸਰਗਰਮੀਆਂ ਦੀ ਸਮੀਖਿਆ ਮੁਖ ਅਜੰਡਾ ਸੀ. ਇਸ ਵਿੱਚ
ਭਦੌੜ, ਦਿੜ੍ਹਬਾ, ਬਰਨਾਲਾ, ਸੰਗਰੂਰ ਇਕਾਈਆਂ ਵੱਲੋਂ ਕੀਤੀਆਂ ਸਰਗਰਮੀਆਂ ਦੀ ਸ਼ਲਾਘਾ ਕੀਤੀ ਗਈ. ਹੁਣ ਤਕ ਰਜਿਸਟਰੇਸ਼ਨ ਨਾ ਕਰਨ ਵਾਲੀਆਂ 
ਇਕਾਈਆਂ ਦੀ ਮਦਦ ਕਰਨ ਦਾ ਫੈਸਲਾ ਕੀਤਾ ਗਿਆ. ਮਾਸਟਰ ਪਰਮ ਵੇਦ ਨੇ ਦੱਸਿਆ ਕਿ ਮੀਟਿੰਗ ਵਿੱਚ ਨਵੇਂ ਸਾਲ ਦੇ ਪਹਿਲੇ ਮਹੀਨੇ ਤਰਕਸ਼ੀਲ ਮੈਗਜੀਨ ਦੀ ਜ਼ਿਕਰਯੋਗ ਗਿਣਤੀ ਵਧਾਉਣ ਦਾ ਫੈਸਲਾ ਵੀ ਕੀਤਾ ਗਿਆ. ਤਰਕਸ਼ੀਲ ਮੀਟਿੰਗਾਂ ਤੇ ਕੰਮ ਵਿਸ਼ੇ ਤੇ ਅਗਲੇ ਮਹੀਨੇ ਵਰਕਸ਼ਾਪ ਕਰਵਾਉਣ ਬਾਰੇ ਵੀ ਸਹਿਮਤੀ ਬਣੀ. ਉਨਾਂ ਕਿਹਾ ਕਿ ਵਿਗਿਆਨਕ ਜਾਗਰੂਕਤਾ ਦੀ ਰੋਸ਼ਨੀ ਹਰ ਪਾਸੇ ਬਿਖੇਰਨਾ ਸਮੇਂ ਦੀ ਮੁਖ ਲੋੜ ਹੈ, ਇਸ ਨਾਲ ਹੀ ਸਮਾਜ ਵਿਚੋਂ ਅੰਧਵਿਸ਼ਵਾਸ ਦਾ ਹਨੇਰਾ ਮਿਟਾਇਆ ਜਾ ਸਕਦਾ ਹੈ.
ਮੀਟਿੰਗ ਵਿੱਚ ਕਰੋਨਾ ਦੇ ਨਾਂ ਤੇ ਸਰਕਾਰੀ ਦਹਿਸ਼ਤ ਫੈਲਾਉਣ ਤੇ ਲਾਈਆਂ ਪਾਬੰਦੀਆਂ ਦਾ ਕਰੜੇ ਸ਼ਬਦਾਂ ਵਿੱਚ ਵਿਰੋਧ ਕੀਤਾ ਗਿਆ. ਉਨਾਂ ਕਿਹਾ ਕਿ ਸਰਕਾਰ ਨੂੰ ਵਿਗਿਆਨਕ ਜਾਣਕਾਰੀ ਦੇ ਆਧਾਰ ਤੇ ਵਾਇਰਸ ਦੀ ਲਾਗ ਤੋਂ ਬਚਣ ਲਈ ਸਾਵਧਾਨੀਆਂ ਵਰਤਣ ਦੇ ਪ੍ਰਚਾਰ ਕਰਨ ਤੇ ਜ਼ੋਰ ਦੇਣਾ ਚਾਹੀਦਾ ਹੈ. ਫਾਸ਼ੀਵਾਦੀ ਸ਼ਕਤੀਆਂ ਦੁਆਰਾ ਸਮਾਜ ਵਿੱਚ ਫਿਰਕੂ ਜ਼ਹਿਰ ਫੈਲਾਉਣ ਦੀ ਵੀ ਨਿਖੇਧੀ ਕੀਤੀ ਗਈ. ਉਨ੍ਹਾਂ ਆਖਿਆ ਕਿ ਤਰਕਸ਼ੀਲਤਾ ਲਈ ਕੰਮ ਕਰਨ ਦਾ ਆਪਣਾ ਮਹੱਤਵ ਹੈ, ਜਿਹੜਾ ਗਿਆਨ, ਵਿਗਿਆਨ ਦੇ ਪਾਸਾਰ ਤੇ ਚੇਤੰਨ ਸਮਾਜ ਲਈ ਅਤਿਅੰਤ ਲੋੜੀਂਦਾ ਹੈ. ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਚੁਣੌਤੀਆਂ ਭਰੇ ਇਸ ਦੌਰ ਵਿੱਚ ਤਰਕਸ਼ੀਲ ਚੇਤਨਾ ਨਾਲ ਹੀ ਫਾਸ਼ੀਵਾਦੀ ਹਕੂਮਤ ਵੱਲੋਂ ਸੋਚੀ ਸਮਝੀ ਸਾਜ਼ਿਸ਼ ਤਹਿਤ ਕੀਤੇ ਜਾ ਰਹੇ ਫਿਰਕਾਪ੍ਰਸਤੀ ਜਿਹੇ ਗ਼ੈਰ ਵਿਗਿਆਨਕ ਕੂੜ੍ਹ ਪ੍ਰਚਾਰ ਨੂੰ ਮਾਤ ਦਿੱਤੀ ਜਾ ਸਕਦੀ ਹੈ. ਮੀਟਿੰਗ ਵਿੱਚ ਸਾਮਾਜ ਵਿੱਚ ਤਰਕਸ਼ੀਲਤਾ ਲਹਿਰ ਦੇ ਨਾਲ ਨਾਲ ਭਾਈਚਾਰਕ ਸਾਂਝ ਨੂੰ ਹੋਰ ਪੱਕਾ ਕਰਨ ਲਈ ਯਤਨ ਜੁਟਾਉਣ ਤੇ ਵੀ ਜ਼ੋਰ ਦਿੱਤਾ ਗਿਆ. ਇਸ ਸਮੇਂ ਤਰਕਸ਼ੀਲ ਕੈਲੰਡਰ 2022 ਵੀ ਰਲੀਜ਼ ਕੀਤਾ ਗਿਆ. ਮੀਟਿੰਗ ਵਿੱਚ ਉਪਰੋਕਤ ਤੋਂ ਇਲਾਵਾ ਗੁਰਪ੍ਰੀਤ ਸ਼ਹਿਣਾ, ਸੋਹਣ ਸਿੰਘ ਮਾਝੀ, ਅਵਤਾਰ ਸਿੰਘ, ਜ਼ੋਰਾ ਸਿੰਘ ਖਿਆਲੀ, ਨਾਇਬ ਸਿੰਘ ਰਟੋਲਾਂ, ਸਹਿਦੇਵ ਸਿੰਘ, ਕੁਲਦੀਪ ਸਿੰਘ ਨੈਣੇਵਾਲ, ਸੁਰਿੰਦਰ ਪਾਲ ਸੰਗਰੂਰ, ਚਰਨ ਕਮਲ ਸਿੰਘ, ਬਿੰਦਰ ਧਨੋਲਾ ਹਾਜ਼ਰ ਸਨ.
