ਤਰਕਸ਼ੀਲ ਮੈਗਜੀਨ ਦੇ ਪਾਠਕਾਂ ਨਾਲ਼ ਰਾਬਤੇ ਖਾਤਰ ਹੋਣਗੀਆਂ ਪਾਠਕ ਮਿਲਣੀਆਂ
ਖਰੜ, 14 ਸਤੰਬਰ 2015 (ਕੁਲਵਿੰਦਰ ਨਗਾਰੀ): ਤਰਕਸ਼ੀਲ ਸੁਸਾਇਟੀ ਪੰਜਾਬ (ਰਜਿ.) ਦੇ ਜੋਨ ਚੰਡੀਗੜ੍ਹ ਦੀ ਮੀਟਿੰਗ ਖਰੜ ਵਿਖੇ ਜੋਨ ਮੁਖੀ ਲੈਕ. ਗੁਰਮੀਤ ਖਰੜ ਦੀ ਪ੍ਰਧਾਨਗੀ ਹੇਠ ਹੋਈ. ਇਸ ਮੀਟਿੰਗ ਵਿੱਚ ਜੋਨ ਮੀਡੀਆ ਮੁਖੀ ਜਰਨੈਲ ਕਰਾਂਤੀ ਨੇ ਵਿਗਿਆਨ ਦੇ ਦਿਨੋ-ਦਿਨ ਹੋ ਰਹੇ ਪਸਾਰ ਦਾ ਜਿਕਰ ਕਰਦਿਆਂ ਕਿਹਾ ਕਿ ਸਾਇੰਸ ਦਾ
ਵਿਰੋਧ ਕਰਨ ਵਾਲੇ ਵਹਿਮਾਂ-ਭਰਮਾਂ ਦੇ ਸੌਦਾਗਰਾਂ ਨੂੰ ਵੀ ਸਾਇੰਸ ਦੀਆਂ ਕਾਢਾਂ ਦੀ ਮੁਥਾਜੀ ਝੱਲਣੀ ਪੈ ਰਹੀ ਹੈ. ਵਿਗਿਆਨ ਉੱਤੇ ਲੋਕਾਂ ਦੇ ਵਧ ਰਹੇ ਭਰੋਸੇ ਕਾਰਨ ਸ਼ਰਧਾ ਦੇ
ਵਪਾਰੀਆਂ ਨੂੰ ਵੀ ਅੰਧ-ਵਿਸ਼ਵਾਸਾਂ ਉੱਤੇ ਵਿਗਿਆਨ ਦਾ ਝੂਠਾ ਲੇਬਲ ਲਗਾ ਕੇ ਆਪਣੀ ਹੋਂਦ ਬਚਾਉਣ ਲਈ ਲਈ ਝੂਜਣਾ ਪੈ ਰਿਹਾ ਹੈ. ਝੂਠੀਆਂ ਗੱਲਾਂ ਨੂੰ ਸੱਚ ਸਾਬਤ ਕਰਨ ਵਾਸਤੇ ਵਿਗਿਆਨ ਨੂੰ ਵੀ ਤੋੜ-ਮਰੋੜ ਕੇ ਪੇਸ਼ ਕਰਨ ਦੇ ਕੋਝੇ ਹੱਥਕੰਡੇ ਵਰਤੇ ਜਾ ਰਹੇ ਹਨ.
ਇਸ ਮੌਕੇ ਸਟੇਟ ਕਮੇਟੀ ਦੀ ਮੀਟਿੰਗ ਦੀ ਰਿਪੋਰਟ ਪੜ੍ਹਦਿਆਂ ਲੈਕ. ਗੁਰਮੀਤ ਖਰੜ ਨੇ ਦੱਸਿਆ ਕਿ ਸੂਬਾ ਕਮੇਟੀ ਦੀ ਤਜਵੀਜ਼ ਮੁਤਾਬਿਕ ਜੋਨ ਚੰਡੀਗੜ੍ਹ ਦੀਆਂ ਸਾਰੀਆਂ ਇਕਾਈਆਂ ਨੂੰ ‘ਪਾਠਕ-ਮਿਲਣੀਆਂ’ ਕਰਾਉਣ ਦੀਆਂ ਹਦਾਇਤਾਂ ਕੀਤੀਆਂ ਗਈਆਂ ਹਨ. ਜਿਸ ਵਿੱਚ ਤਰਕਸ਼ੀਲ ਮੈਗਜ਼ੀਨ ਦੇ ਪਾਠਕ, ਸੁਸਾਇਟੀ ਦੇ ਸਮਰਥਕ ਅਤੇ ਸੁਨਹਿਰੇ ਸਮਾਜ ਦਾ ਸੁਫਨਾ ਦੇਖਣ ਵਾਲ਼ਾ ਵਰਗ ਵੀ ਸਾਮਲ ਹੋ ਸਕੇਗਾ.ਇਸ ਮੌਕੇ ਸਤਨਾਮ ਦਾਊਂ ਨੇ ਦੱਸਿਆ ਕਿ ਇਸ ਫੈਸਲੇ ਤਹਿਤ ਇਕਾਈ ਮੁਹਾਲ਼ੀ ਵੱਲੋਂ 20 ਸਤੰਬਰ ਦਿਨ ਐਤਵਾਰ ਨੂੰ ਬਾਲ ਭਵਨ ਫੇਸ 4 ਵਿਖੇ ਪਾਠਕ-ਮਿਲਣੀ ਕਰਵਾਈ ਜਾਵੇਗੀ. ਮੀਟਿੰਗ ਵਿੱਚ ਕੁਲਵਿੰਦਰ ਨਗਾਰੀ ਅਤੇ ਅਜੀਤ ਪ੍ਰਦੇਸੀ ਨੇ ਜਾਣਕਾਰੀ ਦਿੱਤੀ ਕਿ 27 ਸਤੰਬਰ ਦਿਨ ਐਤਵਾਰ ਨੂੰ ਇਕਾਈ ਖਰੜ ਅਤੇ 4 ਅਕਤੂਬਰ ਦਿਨ ਐਤਵਾਰ ਨੂੰ ਇਕਾਈ ਰੋਪੜ ਵੱਲੋਂ ਵੀ ਪਾਠਕ ਮਿਲਣੀਆਂ ਦਾ ਸਮਾਂ ਤੈਅ ਕੀਤਾ ਜਾ ਚੁੱਕਾ ਹੈ. ਇਸ ਮੌਕੇ ਸੰਦੀਪ ਬੱਸੀ ਪਠਾਣਾ ਨੇ ਦੱਸਿਆ ਕਿ ਬਾਕੀ ਇਕਾਈਆਂ ਵੀ ਪਾਠਕ ਮਿਲਣੀਆਂ ਦੀ ਰੂਪ-ਰੇਖਾ ਜਲਦੀ ਹੀ ਤੈਅ ਕਰ ਲੈਣਗੀਆਂ. ਮੀਟਿੰਗ ਵਿੱਚ ਖਰੜ, ਮੋਹਾਲ਼ੀ, ਰੋਪੜ, ਨੰਗਲ਼, ਬਸੀ ਪਠਾਣਾ, ਸਰਹਿੰਦ ਆਦਿ ਇਕਾਈਆਂ ਦੇ ਆਗੂਆਂ ਨੇ ਹਿੱਸਾ ਲਿਆ.
