ਮੁਜਰਮਾਨਾ ਸੋਚ ਦੇ ਲੋਕ ਧਰਮਾਂ ਨੂੰ ਅਪਣੇ ਹਿਤਾਂ ਵਾਸਤੇ ਵਰਤਕੇ ਫਸਾਦ ਖੜੇ ਕਰਦੇ ਨੇ: ਕਸ਼ਮੀਰ ਸਿੰਘ ਸਰਸਾ

ਸੈਮੀਨਾਰ ਮੌਕੇ ਤਰਕਵਾਦੀ ਵਿਦਵਾਨਾਂ ਦੀਆਂ ਹਤਿਆਵਾਂ ਵਿਰੁਧ ਕੀਤਾ ਪਾਸ ਗਿਆ ਮਤਾ

ਮਾਲੇਰਕੋਟਲਾ, 5 ਅਕਤੂਬਰ (ਡਾ. ਮਜੀਦ ਅਜਾਦ): ਆਮ ਜਨਤਾ ਵਿੱਚ ਜਾਗਰੂਕਤਾ ਪੈਦਾ ਕਰਨ ਲਈ ਤਰਕਸ਼ੀਲ ਸੁਸਾਇਟੀ ਪੰਜਾਬ ਇਕਾਈ ਮਾਲੇਰਕੋਟਲਾ ਵਲੋਂ ਅਜਾਦ ਫਾਉਂਡੇਸ਼ਨ ਟਰਸਟ, ਮਾਲੇਰਕੋਟਲਾ ਦੇ ਸਹਿਯੋਗ ਨਾਲ ਇੱਕ ਸੈਮੀਨਾਰ ‘‘ਫਿਰਕੂਵਾਦ-ਭਾਰਤ ਲਈ ਸੱਭ ਤੋਂ ਵੱਡਾ ਖਤਰਾ’ ਦੇ ਵਿਸ਼ੇ ਅਧੀਨ ਇੱਥੇ ਕਾਰਨੈਟ ਕੈਫੇ,

ਮਾਲੇਰਕੋਟਲਾ ਵਿਖੇ ਕਰਵਾਇਆ ਗਿਆ. ਸੈਮੀਨਾਰ ਦੀ ਸ਼ੁਰੂਆਤ ਕਰਦਿਆਂ ਡਾ. ਮਜੀਦ ਅਜਾਦ ਨੇ ਕਿਹਾ ਕਿ ਰਾਜਨੀਕਤਕ ਲੋਕਾਂ ਦੁਆਰਾ ਭਾਰਤ ਵਰਗੇ ਦੇਸ਼ ਦੇ ਧਰਮ ਨਿਰਪੱਖ ਦੇਸ਼ ਦੇ ਸੈਕੂਲਰ ਢਾਂਚੇ ਨੂੰ ਕੁਚਲਕੇ ਧਾਰਮਿਕ ਘੱਟ ਗਿਣਤੀਆਂ ਵਿੱਚ ਸਹਿਮ ਪੈਦਾ ਕੀਤਾ ਜਾ ਰਿਹਾ ਹੈ, ਅਤੇ ਸਾਜਸ਼ਾਂ ਤਹਿਤ ਫਿਰਕੂ ਦੰਗੇ ਭੜਕਾਏ ਜਾ ਰਹੇ ਹਨ. ਭਾਰਤ ਦੇ ਸੈਕੂਲਰ ਢਾਂਚੇ ਨੂੰ ਕੇਵਲ ਤਾਂ ਹੀ ਬਚਾਇਆ ਹੈ ਜੇਕਰ ਇਨਸਾਫ ਪਸੰਦ ਲੋਕ ਇਸ ਵਾਸਤੇ ਹੰਭਲਾ ਮਾਰਣਗੇ.

ਇਸ ਮੌਕੇ ਮੁੱਖ ਵਕਤਾ ਦੇ ਤੌਰ ਤੇ ਬੋਲਦਿਆਂ ਕਸ਼ਮੀਰ ਸਿੰਘ ਸਰਸਾ ਨੇ ਆਪਣੇ ਕੰਜੀਵਤ ਭਾਸ਼ਨ ਵਿੱਚ ਕਿਹਾ ਕਿ ਫਿਰਕੂਵਾਦ ਪੂੰਜੀਵਾਦ ਦੁਆਰਾ ਪੈਦਾ ਕੀਤਾ ਨਵੇਂ ਦੌਰ ਦਾ ਧਰਮ ਹੈ, ਮੁਜਰਮਾਨਾ ਸੋਚ ਦੇ ਲੋਕ ਗਿਣੀ ਮਿਥੀ ਸਾਜਸ਼ ਤਹਿਤ ਕਦੇ ਧਰਮ ਨੂੰ ਤੇ ਕਦੇ ਸਭਿਆਚਾਰ ਨੂੰ ਵਰਤਕੇ ਆਮ ਲੋਕਾਂ ਵਿੱਚ ਫਸਾਦ ਖੜੇ ਕਰਦੇ ਹਨ, ਤੇ ਆਮ ਗਰੀਬ ਵਰਗ ਇਸ ਫਸਾਦ ਵਿੱਚ ਲਤਾੜਿਆ ਜਾਂਦਾ ਹੈ. ਮੌਜੂਦਾ ਰਾਜਨੀਤਕ ਸਥਿਤੀ ਤੇ ਬੋਲਦਿਆਂ ਉਹਨਾਂ ਕਿਹਾ ਕਿ ਇੱਕ ਰਾਜਨੀਤਕ ਵਰਗ ਵਲੋਂ ਭਾਰਤ ਦੇ ਸਹਿਣਸ਼ੀਲ ਹਿੰਦੂ ਕਲਚਰ ਨੂੰ ਕੱਟੜ ਹਿੰਦੂਵਾਦ ਵਿੱਚ ਬਦਲਣ ਦੀ ਕੋਸਿਸ਼ ਕੀਤੀ ਜਾ ਰਹੀ ਹੈ ਅਤੇ ਸਮਾਜ ਦੇ ਹਰ ਖੇਤਰ ਨੂੰ ਭਗਵੇਂ ਰੰਗ ਵਿੱਚ ਰੰਗਣ ਦੀ ਕੋਸਿਸ਼ ਕੀਤੀ ਜਾ ਰਹੀ ਹੈ. ਜਦਕਿ ਇਸ ਸੱਭ ਦਾ ਹਿੰਦੂਵਾਦ ਨਾਲ ਕੋਈ ਸਬੰਧ ਨਹੀ ਸਗੋਂ ਇਸ ਦੇ ਪਿਛੇ ਸਰਮਾਏਦਾਰ ਵਰਗ ਦੇ ਮੁਨਾਫੇ ਨਾਲ ਜੁੜੇ ਹੋਏ ਮਨੋਰਥ ਹਨ.

ਇਸ ਮੌਕੇ ਡਾ. ਮਜੀਦ ਅਜਾਦ ਵਲੋਂ ਰੱਖੇ ਗਏ ਮਤੇ ਨੂੰ ਸਰਬ-ਸੰਮਤੀ ਨਾਲ ਪਾਸ ਕੀਤਾ ਗਿਆ, ਮਤੇ ਤਹਿਤ ਪਿਛਲੇ ਦਿਨਾਂ ਤੋਂ ਭਾਰਤ ਵਿੱਚ ਸਾਜਸ਼ ਤਹਿਤ ਪ੍ਰੋ. ਕਲਬੁਰਗੀ, ਡਾ. ਨਰਿੰਦਰ ਦਬੋਲਕਰ ਜਿਹੇ ਤਰਕਵਾਦੀ ਵਿਦਵਾਨਾਂ ਦੀਆਂ ਹੱਤਿਆਵਾਂ ਦੀ ਨਿੰਦਿਆ ਕੀਤੀ ਗਈ. ਭਾਰਤ ਵਿੱਚ ‘ਘਰ-ਵਾਪਸੀ’ ‘ਲਵ-ਜਿਹਾਦ’ ਆਦਿ ਦੇ ਨਾਅਰਿਆਂ ਤਹਿਤ ਫਿਰਕੂ ਮਾਹੌਲ ਪੈਦਾ ਕੀਤਾ ਜਾ ਰਿਹਾ ਹੈ ਅਤੇ ਫਿਰਕੂ ਲੋਕਾਂ ਵੱਲੋਂ ਅਫਵਾਹ ਫੈਲਾ ਕੇ ਦਾਦਰੀ ਦੇ ਇਖਲਾਕ ਦੀ ਹੱਤਿਆ ਕਰਨ ਜਿਹੇ ਮੌਕੇ ’ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਵਾਲੀ ਕੇਂਦਰੀ ਸਰਕਾਰ ਵਲੋਂ ਵੱਟੀ ਚੁੱਪ ਨੂੰ ਤੋੜਣ ਲਈ ਗੁਹਾਰ ਲਗਾਈ ਗਈ.

ਇਸ ਸੈਮੀਨਾਰ ਸਮੇਂ ਸਟੇਜ ਦੀ ਕਾਰਵਾਈ ਮੋਹਨ ਬਡਲਾ ਵਲੋਂ ਚਲਾਈ ਗਈ ਅਤੇ ਸੈਮੀਨਾਰ ਨੂੰ ਸਫਲ ਬਨਾਉਣ ਵਿੱਚ ਸਰਾਜ ਅਨਵਰ, ਅਮਜਦ ਵਿਲੋਨ, ਮੇਜਰ ਸਿੰਘ ਸੋਹੀ, ਹਰੀ ਸਿੰਘ ਰੋਹੀੜਾ, ਮਜੀਦ ਦਲੇਲਗੜ, ਨਛੱਤਰ ਸਿੰਘ ਜਰਗ ਆਦਿ ਨੇ ਵਿਸੇਸ਼  ਯੋਗਦਾਨ ਪਾਇਆ. ਹੋਰਨਾਂ ਤੋਂ ਬਿਨਾਂ ਮਹਿਮੂਦ ਅਖਤਰ ਸ਼ਾਦ, ਨੇਤਾ, ਆਮ ਆਦਮੀ ਪਾਰਟੀ, ਮੁਹੰਮਦ ਫੁਰਕਾਨ, ਅਲ-ਫੁਰਕਾਨ ਫਾਉਂਡੇਸ਼ਨ, ਪ੍ਰਿੰਸੀਪਲ ਮੇਜਰ ਸਿੰਘ, ਮੁਹੰਮਦ ਅਸਰਾਰ,ਮੁਹੰਮਦ ਉਸਮਾਨ, ਟਕਵਿੰਦਰ ਅਜਾਦ, ਲੈਕਚਰਾਰ ਅਨਵਰ, ਸ਼ਕੂਰ ਦਲੇਲਗੜ, ਲੈਕਚਰਾਰ ਮੁਹੰਮਦ ਕਫੀਲ, ਨਛੱਤਰ ਸਿੰਘ ਉੱਪੋਕੀ, ਜਸਵਿੰਦਰ ਸਿੰਘ ਲਸੋਈ, ਪੰਜਾਬ ਬਿਜਲੀ ਨਿਗਮ ਆਦਿ ਵਿਸੇਸ਼ ਤੌਰ ਤੇ ਸੈਮੀਨਾਰ ਵਿੱਚ ਸ਼ਾਮਲ ਹੋਏ.