ਤਰਕਸ਼ੀਲ ਆਗੂ ਵੱਲੋਂ ਸੁਰਜੀਤ ਸਿੰਘ ਰੱਖੜਾ ਦੇ ਬਿਆਨ ਦੀ ਨਿਖੇਧੀ

‘ਔਰਬਿਟ ਕਾਂਡ  ਰੱਬੀ ਭਾਣਾ ਨਹੀਂ, ਸਗੋਂ ਅਕਾਲੀਆਂ ਦੀ ‘ਸੇਵਾ ਦਾ ਨਤੀਜਾ; ਕ੍ਰਾਂਤੀ

ਐਸ.ਏ.ਐਸ ਨਗਰ, 3 ਮਈ (ਹਰਪ੍ਰੀਤ): ਤਰਕਸ਼ੀਲ ਸੁਸਾਇਟੀ ਪੰਜਾਬ ਦੇ ਚੰਡੀਗੜ ਦੇ ਜੋਨ ਆਗੂ ਜਰਨੈਲ ਕ੍ਰਾਂਤੀ ਨੇ ਉੱਚ ਸਿੱਖਿਆ ਮੰਤਰੀ ਸੁਰਜੀਤ ਸਿੰਘ ਰੱਖੜਾ ਦੇ ਉਸ ਬਿਆਨ ਦੀ ਸਖ਼ਤ ਨਿਖੇਧੀ ਕੀਤੀ ਹੈ. ਜਿਸ ਵਿੱਚ ਉਹਨਾਂ ਮੋਗਾ ਵਿਖੇ ਲੜਕੀ ਦੀ ਔਰਬਿਟ ਬੱਸ ਵਿੱਚੋਂ ਜਬਰਦਸਤੀ ਧੱਕਾ ਦੇ ਕੇ ਸੁੱਟਣ ਕਾਰਨ ਹੋਈ ਮੌਤ ਨੂੰ

‘‘ਪਰਮਾਤਮਾ ਦਾ ਭਾਣਾ’ ਕਿਹਾ ਸੀ. ਤਰਕਸ਼ੀਲਾਂ ਨੇ ਕਿਹਾ ਕਿ ਨਾ ਤਾਂ ਇਹ ਕਿਸੇ ‘ਪਰਮਾਤਮਾ ਦਾ ਭਾਣਾ’ ਹੈ ਅਤੇ ਨਾਂ ਇਹ ਕਿਸੇ ਦੀ ਕਿਸਮਤ ਵਿੱਚ ਲਿਖਿਆ ਹੋਇਆ ਸੀ ਬਲਕਿ ਇਹ ਅਕਾਲੀ-ਭਾਜਪਾ ਸਰਕਾਰ ਵੱਲੋਂ ਕੀਤੀ ਜਾ ਰਹੀ ‘‘ਰਾਜ ਨਹੀਂ ਸੇਵਾ’ਦਾ ਨਤੀਜਾ ਹੈ. ਤਰਕਸ਼ੀਲ ਆਗੂ ਨੇ ਮੰਤਰੀ ਨੂੰ ਅੰਧਵਿਸ਼ਵਾਸੀ ਸਿਆਸਤਦਾਨ ਗਰਦਾਨਦਿਆਂ ਕਿਹਾ ਕਿ ਮੰਤਰੀ ਲੜਕੀ ਦੇ ਪਰਿਵਾਰ ਦੇ ਦੁੱਖ ਵਿੱਚ ਸ਼ਰੀਕ ਹੋਣ ਅਤੇ ਸੂਬੇ ਵਿੱਚ ਬਾਦਲ ਪਰਿਵਾਰ ਦੀਆਂ ਬੱਸਾਂ ਵੱਲੋਂ ਕੀਤੀ ਜਾ ਰਹੀ ਗੁੰਡਾਗਰਦੀ ਦੀ ਆਲੋਚਨਾ ਕਰਨ ਦੀ ਬਜਾਏ ਲੋਕਾਂ ਨੂੰ ਅੰਧਵਿਸ਼ਵਾਸ ਦੇ ਰਸਤੇ 'ਤੇ ਤੋਰ ਰਹੇ ਹਨ. ਦੱਸਣਯੋਗ ਹੈ ਕਿ ਉੱਚ ਸਿੱਖਿਆ ਮੰਤਰੀ ਸੁਰਜੀਤ ਸਿੰਘ ਰੱਖੜਾ ਨੇ ਲੰਘੇ ਦਿਨ ਇਹ ਇਹ ਕਹਿ ਕੇ ਵਿਵਾਦ ਛੇੜ ਦਿੱਤਾ ਸੀ ਕਿ ਲੜਕੀ ਦੀ ਮੌਤ ‘ਕੁਦਰਤ ਦਾ ਭਾਣਾ' ਹੈ ਅਤੇ ਹਾਦਸਿਆਂ ਨੂੰ ਕੋਈ ਨਹੀਂ ਰੋਕ ਸਕਦਾ. ਉਹਨਾਂ ਇਹ ਵੀ ਕਿਹਾ ਸੀ ਕਿ ਜੋ ਕੁੱਝ ਵਾਪਰਿਆ ‘ਸਭ ‘ਪਰਮਾਤਮਾ ਦੀ ਮਰਜੀ’ ਹੈ.

ਅੱਜ ਇਸ ਵਿਵਾਦਿਤ ਬਿਆਨ 'ਤੇ ਹੋਰ ਗੱਲਬਾਤ ਕਰਦਿਆਂ ਆਗੂ ਜਰਨੈਲ ਕ੍ਰਾਂਤੀ ਨੇ ਕਿਹਾ ਜੇਕਰ ਸਰਕਾਰ ਚਾਹੇ ਤਾਂ ਹਾਦਸਿਆਂ ਨੂੰ ਰੋਕ ਸਕਦੀ ਹੈ, ਇਹ ਕੋਈ ਕੁਦਰਤੀ ਭਾਣਾ ਨਹੀਂ. ਉਹਨਾਂ ਮੰਤਰੀ ਨੂੰ ਸਵਾਲ ਕੀਤਾ ਕਿ ਸ਼੍ਰੀ ਰੱਖੜਾ ਆਪ ਬਾਹਰਲੇ ਦੇਸ਼ਾਂ ਵਿੱਚ ਘੁੰਮਦੇ ਹਨ, ਕੀ ਉੱਥੇ ਵੀ ਹਾਦਸੇ ਕੁਦਰਤੀ ਭਾਣਾ ਹਨ ਜਾਂ ਉੱਥੋਂ ਦੀਆਂ ਸਰਕਾਰਾਂ ਨੇ ਡਿਵਾਈਡਰਾਂ ਸਮੇਤ ਚੌੜੀਆਂ ਸੜਕਾਂ ਬਣਾ ਕੇ ਉਹਨਾਂ ਨੂੰ ਕੰਟਰੋਲ ਕੀਤਾ ਹੈ? ਉਹਨਾਂ ਕਿਹਾ ਕਿ ਜੇਕਰ ਇੱਕ ਉੱਚ ਸਿੱਖਿਆ ਮੰਤਰੀ ਹੀ ਸਾਰਾ ਕੁੱਝ ਰੱਬ ਤੇ ਸੁੱਟਦਾ ਹੈ ਤਾਂ ਉਹ ਵਿਦਿਆਰਥੀਆਂ ਨੂੰ ਕਿਸ ਤਰਾਂ ਗੈਰਵਿਗਿਆਨਿਕ ਸੋਚ ਵਿੱਚੋਂ ਕੱਢੇਗਾ ਅਤੇ ਉਹਨਾਂ ਨੂੰ ਕਿਸ ਤਰਾਂ ਆਪਣੇ ਪੈਰਾਂ ਤੇ ਖੜਾ ਕਰੇਗਾ? ਤਰਕਸ਼ੀਲ ਆਗੂ ਨੇ ਕਿਹਾ ਕਿ ਇਹੋ ਜਿਹੇ ਸਿਆਸਤਦਾਨ ਲੋਕਾਂ ਨੂੰ ਆਪਣੀ ਹੋਣੀ ਦਾ ਆਪ ਮਾਲਕ ਨਹੀਂ ਬਣਨ ਦੇਣਾ ਚਾਹੁੰਦੇ. ਇਹ ਨਹੀਂ ਚਾਹੁੰਦੇ ਕਿ ਲੋਕ ਜਾਗਰੂਕ ਹੋਣ. ਉਹਨਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਇਹੋ ਜਿਹੇ ਸਿਆਸਤਦਾਨਾਂ ਨੂੰ ਮੂੰਹ ਨਾ ਲਾਉਣ ਜੋ ਉਹਨਾਂ ਨੂੰ ਕਿਸਮਤਵਾਦ, ਰੱਬੀ ਭਾਣੇ ਵਿੱਚ ਫਸਾ ਕੇ ਰੱਖਣਾ ਚਾਹੁੰਦੇ ਹਨ. ਤਰਕਸ਼ੀਲਾਂ ਨੇ ਉੱਚ ਸਿੱਖਿਆ ਮੰਤਰੀ ਨੂੰ ਫੌਰੀ ਤੌਰ ਤੇ ਆਪਣਾ ਬਿਆਨ ਵਾਪਸ ਲੈਣ ਤੇ ਵਿਗਿਆਨ ਦੀਆਂ ਕਿਤਾਬਾਂ ਪੜਨ ਦੀ ਸਲਾਹ ਦਿੱਤੀ ਤਾਂਕਿ ਉਹ ਕਿਸਮਤਵਾਦ ਅਤੇ ਰੱਬੀ ਭਾਣਿਆਂ ਦੇ ਚੱਕਰਾਂ ਵਿੱਚੋਂ ਨਿੱਕਲ ਕੇ ਵਿਦਿਆਰਥੀਆਂ ਨੂੰ ਕੋਈ ਸਹੀ ਸੇਧ ਦੇ ਸਕਣ.