ਤਰਕਸ਼ੀਲ ਸੁਸਾਇਟੀ ਦੀ ਇਕਾਈ ਮੋਹਾਲੀ ਦੇ ਚੋਣ ਅਜਲਾਸ ਵਿੱਚ ਜਸਵੰਤ ਮੋਹਾਲੀ ਬਣੇ ਜਥੇਬੰਦਕ ਮੁਖੀ

ਚੁੰਨੀ ਵਿਖੇ ਨਾਟਕ ਮੇਲਾ  26 ਮਾਰਚ ਨੂੰ

ਮੋਹਾਲੀ, 22 ਮਾਰਚ (ਡਾ.ਮਜੀਦ ਆਜਾਦ): ਲੋਕਾਂ ਦਾ ਸੋਚਣਢੰਗ ਵਿਗਿਆਨਕ ਬਣਾਉਣ ਲਈ ਯਤਨਸ਼ੀਲ ਤਰਕਸ਼ੀਲ ਸੁਸਾਇਟੀ ਪੰਜਾਬ ਇਕਾਈ ਮੋਹਾਲੀ ਦਾ ਚੋਣ ਅਜਲਾਸ ਜ਼ੋਨ ਚੰਡੀਗੜ੍ਹ ਦੇ ਜਥੇਬੰਦਕ ਮੁਖੀ ਪ੍ਰਿੰਸੀਪਲ ਗੁਰਮੀਤ ਖਰੜ ਦੀ ਨਿਗਰਾਨੀ ਵਿੱਚ ਸ਼ਹੀਦ ਭਗਤ ਸਿੰਘ ਲਾਇਬਰੇਰੀ ਬਲੌਂਗੀ ਵਿਖੇ ਹੋਇਆ. ਸਭ ਤੋਂ ਪਹਿਲਾਂ ਸਾਬਕਾ ਜੱਥੇਬੰਦਕ

ਮੁਖੀ ਵੱਲੋਂ ਨਵੇਂ ਮੈਂਬਰਾਂ ਨਾਲ ਜਾਣ ਪਛਾਣ ਕਰਾਈ ਗਈ. ਇਸ ਉਪਰੰਤ ਉਨ੍ਹਾਂ ਦੋ ਸਾਲਾਂ ਦੀ ਕਾਰਗੁਜਾਰੀ ਰਿਪੋਰਟ ਪੇਸ਼ ਕੀਤੀ ’ਤੇ ਵਿਚਾਰ ਵਟਾਂਦਰਾ ਕਰਨ ਉਪਰੰਤ ਕਾਰਗੁਜ਼ਾਰੀ ਰਿਪੋਰਟ ਨੂੰ ਪਾਸ ਕੀਤਾ ਗਿਆ. ਇਸ ਤੋਂ ਬਾਅਦ ਪਹਿਲੀ ਕਾਰਜਕਾਰਨੀ ਨੂੰ ਭੰਗ ਕਰਕੇ 2023-25 ਦੋ ਸਾਲਾਂ ਲਈ ਨਵੀਂ ਕਾਰਜਕਾਰਨੀ ਨੂੰ ਸਰਵਸੰਮਤੀ ਨਾਲ ਚੁਣਿਆ ਗਿਆ.

ਨਵੀਂ ਟੀਮ ਵਿੱਚ ਜਸਵੰਤ ਮੋਹਾਲੀ ਨੂੰ  ਜਥੇਬੰਦਕ ਮੁਖੀ ਦੀ ਜਿਮੇਵਾਰੀ ਸੌਂਪੀ ਗਈ, ਵਿੱਤ ਵਿਭਾਗ ਦੀ ਜਰਨੈਲ ਕ੍ਰਾਂਤੀ ਸਿੰਘ, ਮੀਡੀਏ ਦੀ ਜੁੰਮੇਵਾਰੀ ਡਾ. ਮਜੀਦ ਆਜਾਦ, ਮਾਨਸਿਕ ਸਿਹਤ ਮਸ਼ਵਰਾ ਵਿਭਾਗ ਦੇ ਮੁਖੀ ਦੀ ਜੁੰਮੇਵਾਰੀ ਇਕਬਾਲ ਸਿੰਘ ਤੇ ਸਭਿਆਚਾਰਕ ਵਿਭਾਗ ਦੀ ਜੁੰਮੇਵਾਰੀ ਗੋਰਾ ਹੋਸ਼ਿਆਰਪੁਰੀ ਨੂੰ ਸੌਂਪੀ ਗਈ,ਮੀਡੀਆ ਵਿਭਾਗ ਵਿੱਚ ਸਤਨਾਮ ਆਜਾਦ ਨੂੰ ਸਹਾਇਕ ਵਜੋਂ ਲਿਆ.ਇਸ ਦੇ ਨਾਲ ਹੀ ਜ਼ੋਨ ਤੇ ਸੂਬਾ ਚੋਣ ਅਜਲਾਸ ਵਿੱਚ ਭਾਗ ਲੈਣ ਲਈ ਡਾ. ਮਜੀਦ ਆਜਾਦ ਨੂੰ ਡੈਲਗੇਟ ਚੁਣਿਆ ਗਿਆ. 

ਅੱਜ ਦੇ ਚੋਣ ਅਜਲਾਸ ਵਿੱਚ ਉਪਰੋਕਤ ਤੋਂ ਇਲਾਵਾ ਸੁਰਜੀਤ ਸਿੰਘ ਲੈਕਚਰਾਰ, ਗੁਰਤੇਜ ਸਿੰਘ , ਅਧਿਆਪਕ ਆਗੂ ਗੁਰਪਿਆਰ ਸਿੰਘ, ਸਤਨਾਮ ਆਜਾਦ, ਉਦਯੋਗਪਤੀ ਜਸਵਿੰਦਰ ਸਿੰਘ, ਸਮਸ਼ੇਰ ਚੋਟੀਆਂ, ਸਤਵਿੰਦਰ ਚੁੰਨੀ ਕਲਾਂ ਨੇ ਭਾਗ ਲਿਆ.ਆਗੂਆਂ ਨੇ ਲੋਕਾਂ ਨੂੰ ਅੰਧਵਿਸ਼ਵਾਸਾਂ ,ਵਹਿਮਾਂਭਰਮਾਂ ਤੇ ਰੂੜ੍ਹੀਵਾਦੀ ਵਿਚਾਰਾਂ ਦੇ ਹਨੇਰੇ ਵਿੱਚੋਂ ਨਿਕਲ ਕੇ ਵਿਗਿਆਨਕ ਵਿਚਾਰਾਂ ਦੀ ਰੋਸ਼ਨੀ ਵਿੱਚ ਆਉਣ ਦਾ ਭਾਵਪੂਰਤ ਸੁਨੇਹਾ ਦਿੱਤਾ. ਨਵੀਂ ਕਮੇਟੀ ਵਲੋਂ 26 ਮਾਰਚ ਦੀ ਸ਼ਾਮ ਨੂੰ ਸ਼ਹੀਦ ਭਗਤ ਸਿੰਘ ਅਤੇ ਸਾਥੀਆਂ ਦੀ ਸ਼ਹੀਦੀ ਨੂੰ ਸਮਰਪਿਤ 'ਨਾਟਕ ਮੇਲਾ' ਚੁੰਨੀ ਕਲਾਂ ਵਿਖੇ ਕਰਵਾਉਣ ਦਾ ਫੈਸਲਾ ਕੀਤਾ ਗਿਆ.