ਰੁਜ਼ਗਾਰ ਹੋਵੇ ਚੋਣਾਂ ਦਾ ਮੁੱਖ ਮੁੱਦਾ; ਖਰੜ ਗੁਰਮੀਤ
ਖਰੜ, 16 ਫਰਵਰੀ (ਕੁਲਵਿੰਦਰ ਨਗਾਰੀ): ਤਰਕਸ਼ੀਲ ਇਕਾਈ ਖਰੜ੍ਹ ਦੀ ਮਹੀਨਾਵਾਰ ਮੀਟਿੰਗ ਵਿੱਚ 'ਅਸੈਂਬਲੀ ਚੋਣਾਂ-2022' ਵਿਸ਼ੇ ਉੱਤੇ ਵਿਚਾਰ-ਚਰਚਾ ਹੋਈ. ਇਸ ਵਿਚਾਰ ਚਰਚਾ ਵਿੱਚ ਬੋਲਦਿਆਂ ਚੰਡੀਗੜ੍ਹ ਜ਼ੋਨ ਦੇ ਮੁਖੀ ਖਰੜ ਗੁਰਮੀਤ ਨੇ ਕਿਹਾ ਕਿ ਵੈਸੇ ਤਾਂ ਇਸ ਮੁਨਾਫ਼ੇਖੋਰ ਸਿਸਟਮ ਵਿੱਚ ਲੋਕਾਂ ਦੀਆਂ
ਸਮੱਸਿਆਵਾਂ ਦਾ ਹੱਲ ਪੂਰਨ ਤੌਰ ਉੱਤੇ ਸੰਭਵ ਨਹੀਂ ਹੈ. ਪਰ ਜਿੰਨਾ ਚਿਰ ਇਸ ਸਰਮਾਏਦਾਰਾ ਪ੍ਰਬੰਧ ਤੇ ਇਸਦੀਆਂ ਪਾਰਲੀਮਾਨੀ ਸੰਸਥਾਵਾਂ ਦਾ ਕੋਈ 
ਇਨਕਲਾਬੀ ਬਦਲ ਪੇਸ਼ ਨਹੀਂ ਹੁੰਦਾ, ਓਨਾ ਚਿਰ ਛੋਟੇ-ਮੋਟੇ ਫਾਇਦਿਆਂ ਨੂੰ ਮੁੱਖ ਰੱਖ ਕੇ ਵੋਟ ਪਾਉਣ ਦੀ ਬਜਾਏ ਰੁਜ਼ਗਾਰ, ਸਿੱਖਿਆ, ਸਿਹਤ ਸਹੂਲਤਾਂ ਆਦਿ ਮੁੱਦਿਆਂ ਦੇ ਆਧਾਰ 'ਤੇ ਉਮੀਦਵਾਰ ਦੀ ਚੋਣ ਕਰਨੀ ਚਾਹੀਦੀ ਹੈ. ਰੁਜਗਾਰ ਦਾ ਮਸਲਾ ਇਸ ਕਰਕੇ ਸਭ ਤੋਂ ਅਹਿਮ ਹੈ ਕਿ ਜਿਨਾਂ ਕੋਲ ਰੁਜਗਾਰ ਹੁੰਦਾ ਹੈ ਬਾਕੀ ਸਹੂਲਤਾਂ ਤਾਂ ਉਹ ਆਪ ਹੀ ਪ੍ਰਾਪਤ ਕਰਨ ਦੇ ਯੋਗ ਬਣ ਜਾਂਦੇ ਹਨ.
ਮੀਟਿੰਗ ਵਿੱਚ ਹਾਜ਼ਰ ਇਕਾਈ ਮੁਖੀ ਕੁਲਵਿੰਦਰ ਨਗਾਰੀ ਨੇ ਕਿਹਾ ਕਿ ਹਰ ਵਾਰੀ ਲੋਕਾਂ ਨੂੰ ਲਾਰੇ ਲਾਕੇ ਪਾਰਟੀਆਂ ਰਾਜਸੱਤਾ ਹਾਸਲ ਕਰ ਲੈਂਦੀਆਂ ਹਨ. ਪਰ ਜਨਤਾ ਦੇ ਹਾਲਾਤ ਜਿਉਂ ਦੇ ਤਿਉਂ ਬਣੇ ਰਹਿੰਦੇ ਹਨ. ਇਸਦਾ ਮਤਲਬ ਹੈ ਵੋਟਾਂ ਵੀ ਮਾੜੇ ਪ੍ਰਬੰਧ ਖਿਲਾਫ ਲੋਕਾਂ ਦੇ ਗੁੱਸੇ ਦਾ ਵੋਟ ਪਰਚੀਆਂ ਰਾਹੀਂ ਨਿਕਾਸ ਕਰਨ ਦਾ ਜਰੀਆ ਹੀ ਹਨ. ਦਰਅਸਲ ਵੋਟਿੰਗ-ਪ੍ਰਣਾਲ਼ੀ ਲੋਕਾਂ ਦੇ ਵਿਦਰੋਹ ਨੂੰ ਵੋਟਾਂ ਰਾਹੀ ਖਾਰਜ ਕਰਕੇ ਸਥਾਪਤੀ ਦੀ ਉਮਰ ਲੰਬੀ ਕਰਨ ਦਾ ਕੰਮ ਹੀ ਕਰਦੀ ਹੈ.
ਮਾਨਸਿਕ ਸਿਹਤ ਚੇਤਨਾ ਵਿਭਾਗ ਦੇ ਮੁਖੀ ਸੁਰਿੰਦਰ ਸਿੰਬਲ਼ਮਾਜਰਾ ਅਤੇ ਜਰਨੈਲ ਸਹੌੜਾਂ ਨੇ ਕਿਹਾ ਕਿ ਵੋਟਾਂ ਸਮੇਂ ਕੁਝ ਅਨਸਰਾਂ ਵੱਲੋਂ ਭੜਕਾਊ ਅਤੇ ਫਿਰਕੂ ਬਿਆਨਬਾਜੀ ਕੀਤੀ ਜਾਂਦੀ ਹੈ. ਪਰ ਲੋਕਾਂ ਨੂੰ ਸਦਭਾਵਨਾ ਅਤੇ ਆਪਸੀ ਭਾਈਚਾਰਾ ਬਣਾ ਕੇ ਰੱਖਣਾ ਚਾਹੀਦਾ ਹੈ. ਜੇਕਰ ਸੰਭਵ ਹੋਵੇ ਤਾਂ ਹਰੇਕ ਪੋਲਿੰਗ ਸਟੇਸਨ ਉੱਪਰ ਇੱਕੋ ਸਾਂਝਾ ਬੂਥ ਲਾਇਆ ਜਾਵੇ ਤਾਂ ਕਿ ਪਾਰਟੀਬਾਜੀ ਤੋਂ ਉੱਪਰ ਉੱਠ ਕੇ ਲੋਕ-ਏਕਤਾ ਨੂੰ ਕਾਇਮ ਰੱਖਿਆ ਜਾ ਸਕੇ. ਰਾਜਨੀਤਿਕ ਪਾਰਟੀਆਂ ਦੀ ਬਜਾਇ ਲੋਕਾਂ ਦੀ ਅਸਲ ਤਾਕਤ ਲੋਕਾਂ ਦੀਆਂ ਜਥੇਬੰਦੀਆਂ ਤੇ ਉਹਨਾਂ ਦੇ ਸੰਘਰਸ਼ ਹੀ ਹਨ. ਇਸ ਮੌਕੇ ਹਾਜ਼ਰ ਤਰਕਸ਼ੀਲ ਆਗੂਆਂ ਸੁਜਾਨ ਬਡਾਲ਼ਾ, ਭੁਪਿੰਦਰ ਮਦਨਹੇੜੀ, ਭੁਪਿੰਦਰ ਮਦਨਹੇੜੀ, ਬਿਕਰਮਜੀਤ ਸੋਨੀ ਅਤੇ ਰਾਮ ਕ੍ਰਿਸ਼ਨ ਧੁਨਕੀਆਂ ਆਦਿ ਨੇ ਵੀ ਆਪਣੇ ਵਿਚਾਰ ਰੱਖੇ