Hits: 1949

ਵਿਦਿਆਰਥੀਆਂ ਨੂੰ ਵਹਿਮਾਂ-ਭਰਮਾਂ ਤੋਂ ਜਾਗਰੁਕ ਕਰਵਾਇਆ                  

ਭੀਖੀ, 11ਮਾਰਚ (ਭੁਪਿੰਦਰ ਫ਼ੌਜੀ): ਇੱਥੋਂ ਦੇ ਨਜ਼ਦੀਕ ਪਿੰਡ ਫਫੜੇ ਭਾਈਕੇ ਵਿਖੇ ਜਵਾਹਰ ਨਵੋਦਿਆ ਵਿਦਿਆਲਿਆ ਸਕੂਲ ਵਿੱਚ ਤਰਕਸ਼ੀਲ ਸੁਸਾਇਟੀ ਪੰਜਾਬ ਰਜਿ: ਦੀ ਸਾਹਿਤਕ ਵੈਨ ਪਹੁੰਚੀ. ਇਸ ਸਮੇਂ ਵਹਿਮਾਂ-ਭਰਮਾਂ ਤੋਂ ਜਾਗਰੁਕ ਕਰਦਿਆਂ ਇੱਕ ਪ੍ਰੋਗਰਾਮ ਪੇਸ਼ ਕੀਤਾ ਗਿਆ. ਵੈਨ ਇਨਚਾਰਜ਼ ਜਸਵੀਰ ਸੋਨੀ ਨੇ ਵਿਦਿਆਰਥੀਆਂ

ਨੂੰ ਸੰਬੋਧਨ ਕਰਦਿਆ ਕਿਹਾ ਅੱਜ ਵਿਗਿਆਨ ਦਾ ਯੁੱਗ ਹੈ ਸਾਡੇ ਲੋਕ ਫਿਰ ਵੀ ਪਾਖੰਡੀ ਸਾਧਾਂ-ਸੰਤਾਂ ਤੋਂ ਲੁੱਟ ਕਰਵਾਈ ਜਾਂਦੇ ਹਨ. ਉਹਨਾਂ ਕਿਹਾ ਸਾਡਾ ਬਹੁਤਾ ਤਬਕਾ ਪੜ੍ਹ-ਲਿਖ ਗਿਆ ਹੈ ਪਰ ਉਹਨਾਂ ਨੇ ਕੁੱਝ ਸਿੱਖਿਆ ਹੀ ਨਹੀਂ, ਅਜਿਹੇ ਲੋਕਾਂ ਨੂੰ ਆਮ ਹੀ ਅਨਪੜ੍ਹ ਸਾਧਾਂ-ਸੰਤਾਂ ਦੇ ਪੈਰਾਂ ਤੇ ਨੱਕ ਰਗੜਦੇ ਦੇਖਿਆ ਜਾ ਸਕਦਾ ਹੈ. ਹੁਣ ਲੋੜ ਹੈ ਸਾਨੂੰ ਵਿਗਿਆਨ ਦੇ ਧਾਰਨੀ ਹੋਣ ਦੀ ਤੇ ਹਰ ਘਟਨਾ ਦੀ ਤਰਕ ਦੀ ਕਸੋਟੀ ਤੇ ਪਰਖ ਕਰਨ ਦੀ. ਉਹਨਾਂ ਨੇ ਬਹੁਤ ਸਾਰੀਆਂ ਉਦਹਾਰਣਾਂ ਦੇ ਕੇ ਬਾਬਿਆਂ ਦੀ ਲੁੱਟ ਤੋਂ ਬਚਣ ਲਈ ਪ੍ਰੇਰਤ ਕੀਤਾ.

ਤਰਕਸ਼ੀਲ ਸੁਸਾਇਟੀ ਇਕਾਈ ਭੀਖੀ ਦੇ ਆਗੂ ਭੁਪਿੰਦਰ ਫ਼ੌਜੀ ਨੇ ਜਾਦੂ ਦੇ ਟਰਿਕ ਦਿਖਾਕੇ ਜਿੱਥੇ ਵਿਦਿਆਰਥੀਆਂ ਦਾ ਮਨੋਰੰਜਨ ਕੀਤਾ ਉੱਥੇ ਇਸ ਪਿੱਛੇ ਵਿਗਿਆਨ ਦੀ ਕਿਹੜੀ ਤਕਨੀਕ ਕੰਮ ਕਰਦੀ ਹੈ ਦੀ ਜਾਣਕਾਰੀ ਵੀ ਦਿੱਤੀ. ਸਕੂਲ ਪ੍ਰਿੰਸੀਪਲ ਬਲਬੀਰ ਸਿੰਘ ਧਾਲੀਵਾਲ ਨੇ ਤਰਕਸ਼ੀਲ ਸੁਸਾਇਟੀ ਦੇ ਆਗੂਆਂ ਦਾ ਧੰਨਵਾਦ ਕੀਤਾ. ਪ੍ਰੋਗਰਾਮ ਸਮੇਂ ਵਿਦਿਆਰਥੀਆਂ ਨੇ ਵੱਧ-ਚੜ੍ਹ ਕੇ ਸਾਹਿਤ ਦੀ ਖਰੀਦਦਾਰੀ ਕੀਤੀ.